Aðdáendur þurftu frá að hverfa af blaðamannafundi Bjarkar

Fullt var út úr dyrum í Norræna húsinu nú fyrir stundu þegar blaðamannafundur Bjarkar Guðmundsdóttur hófst. Færri komust að en vildu en aðeins blaðamamönnum var leyfður aðgangur.

Björk kallaði til fundarins vegna kaupa Magma Energy á HS Orku sem hafa verið mjög umdeild þar sem kaupin fóru fram í gegnum skúffufyrirtæki Magma í Svíþjóð. Eftir að nýjar upplýsingar komu fram í málinu í síðustu viku ákvað Björk að blása til blaðamannafundar.

Blaðamaður Vísis sem staddur er á fundinum segir marga hafa staðið vonsvikna fyrir utan þegar tilkynnt var að fundurinn væri aðeins fyrir blaðamenn. Engu að síður hafi verið múgur og margmenni á blaðamannafundinum sjálfum þar sem fulltrúar erlendu pressunnar létu einnig sjá sig.

Ekki voru leyfðar spurningar á fundinum heldur reifaði Björk þær spurningar sem hún birti á heimasíðu sinni bjork.com í morgun og sagði þetta samviskuspurningar sem ríkisstjórnin þyrfti að svara. Björk hefur bent á að í ljósi þess hve sölu- og samningaferli í Magma-málinu hafi verið umdeilt og ógagnsætt, sé mikilvægt að umboðsmaður Alþingis taki það til skoðunar til að vita hvort hagsmuna almennings hafi verið gætt á fullnægjandi hátt.

Það voru svo Jón Þórisson arkítekt og aðstoðarmaður Evu Joly og Oddný Eir Ævarsdóttir rithöfundur sem héldu tölu. Jón sagði meðal annars að það væri mikið í húfi ef ekkert væri að gert, það væri veislubragð í loftinu: „Nú skal grætt," sagði hann og vísaði til viðskiptahátta Magma Energy.

Björk lauk fundinum á því að syngja nokkur lög.