Tveir í varðhaldi eftir húsleitir á Akureyri

Síðastliðið þriðjudagskvöld framkvæmdi lögreglan á Akureyri viðamiklar húsleitir á þremur stöðum samtímis á Akureyri vegna gruns um fíkniefnamisferli. Í tilkynningu frá lögreglunni segir að hald hafi verið lagt á 1,2 kíló af ætluðu amfetamíni og rúmlega 100 grömm af hassi. Einnig hafi fundist rými sem ljóst sé að hafði verið notað til kannabisframleiðslu og þar hafi verið lagt hald á tólf ljósalampa og annan búnað til slíkrar framleiðslu. Auk þessa var lagt hald á búnað til landaframleiðslu.

Í gær voru tveir menn á þrítugs- og fimmtugsaldri úrskurðaðir í Hérðasdómi Norðurlands eystra í fimm og tíu daga gæsluvarðhald. Að aðgerðinni komu auk lögreglunnar á Akureyri menn frá sérsveit Ríkislögreglustjóra og lögreglumenn með tvo fíkniefnahunda frá Blönduósi og Ríkislögreglustjóra.

Lögreglan á Akureyri segir að þetta sé mesta magn fíkniefna sem lögreglan þar hafi lagt hald á í einni aðgerð. Málið er til rannsóknar og ekki unnt að veita frekari upplýsingar að svo stöddu.