Ríkisendurskoðun í saumana á fjárhag Byggðastofnunar

Ríkisendurskoðun hefur ákveðið að fara sérstaklega yfir fjárhag Byggðastofnunar í kjölfar frétta um útlán sem tryggð eru með veði í úthafsrækjukvóta. Þá hyggst Katrín Júlíusdóttir, iðnaðarráðherra, óska eftir upplýsingum um lánveitingar til fyrirtækja í rækjuvinnslu hjá forstjóra stofnunarinnar.

Eins og fréttastofa greindi frá í gærkvöldi eru einu tryggingar Byggðastofnunar fyrir lánum, sem samtals nema 1,3 milljörðum króna, sem stofnunin veitti til nokkurra fyrirtækja á sviði rækjuútgerðar og vinnslu í verðlausum rækjukvóta einum og sér, þrátt fyrir að slíkt stríði gegn samningsveðlögunum. Útlit er fyrir að afskrifa þurfi stóran hluta lánveitinganna.

Í kjölfar þessara umfjöllunar fréttastofunnar hefur Sveinn Arason, ríkisendurskoðandi, ákveðið að fara sérstaklega yfir efnahag Byggðastofnunar, en Sveinn staðfesti þetta í samtali við fréttastofu í dag.

Samkvæmt heimildum fréttastofu hefur Byggðastofnun gefið þær skýringar á þessum útlánum til fyrirtækja í rækjuútgerð að um síðustu áramót hafi um helmingur af þessum lánum þegar verið afskrifaður.

Katrín Júlíusdóttir, iðnaðarráðherra, er í sumarfríi á landsbyggðinni en sagði í samtali við fréttastofu að hún hefði ákveðið að óska sérstaklega eftir upplýsingum um þessar lánveitingar hjá forstjóra Byggðastofnunar.

Fjárhagur Byggðastofnunar gæti verið betri, en á síðasta rekstrarári var eiginfjárhlutfall stofnunarinnar 5 prósent, en hlutfallið má lögum samkvæmt ekki fara undir 8 prósent.

Að beiðni Byggðastofnunar vann Ríkisendurskoðun úttekt og greiningu á efnahagsreikningi stofnunarinnar á síðasta ári og sá Ríkisendurskoðun ekki ástæðu til að gera athugasemdir.

Í framhaldinu ákvað Alþingi að auka eigið fé Byggðastofnunar um 2,6 milljarða króna með fjáraukalögum 2009. Jafnframt samþykkti Alþingi allt að eins milljarðs króna framlag til viðbótar til að bæta eigið fé stofnunarinnar á fjárlögum 2010.

Þetta verður því í annað sinn á skömmum tíma sem Ríkisendurskoðun fer í úttekt og greiningu á efnahag Byggðastofnunar.