Formaður stjórnarinnar lofaði nafnleynd

Árni Geir Pálsson var einn þriggja umsækjenda sem boðaðir voru í viðtal vegna stöðu framkvæmdastjóra Íslandsstofu, ásamt Margréti Jónsdóttur og Jóni Ásbergssyni. Kom það fram í fréttum RÚV í gærmorgun. Árni er mjög ósáttur með nafnbirtinguna og segir Friðrik Pálsson, formann stjórnar Íslandsstofu, hafa lofað sér nafnleynd sem umsækjanda.

„Mér var heitið trúnaði og hann er núna rofinn. Ég bað um nafnleynd áður en umsóknarfrestur rann út og Friðrik féllst á það," segir Árni. „Hann tók skýrt fram að ég fengi tækifæri til að draga umsókn mína til baka ef sótt yrði á hann að birta nöfn umsækjenda. Þetta er ekki í neinu samræmi við eðlilega stjórnsýslu." Árni segist ekkert ætla að aðhafast í málinu en harmar verulega að nafn hans hafi komið upp í fjölmiðlum.

Kolbrún Halldórsdóttir, Einar Karl Haraldsson og Ólöf Ýrr Atladóttir, stjórnarmeðlimir hjá Íslandsstofu, vildu ekki tjá sig um málið. Vísað var í formann stjórnar, Friðrik Pálsson, en ekki náðist í hann.

Umfjöllun hefur verið í fjölmiðlum að undanförnu varðandi kunningsskap Friðriks og Jóns Ásbergssonar. Þeir eiga að baki langt samstarf og eru saman í Rotaryklúbbi Reykjavíkur. - sv