Falsaðir peningaseðlar fundust í Eyjum

Tvær tilkynningar bárust lögreglunni í Vestmannaeyjum um falsaða peningaseðla í síðustu viku. Þegar verið var að fara yfir uppgjör frá tveimur verslunum komu í ljós tveir falsaðir peningaseðlar, 1.000 krónu seðill og 5.000 krónu seðill. Málin eru í rannsókn hjá lögreglunni.

Þá var tilkynnt um tvo aðila sem voru fyrir innan girðingu á útisvæði sundlaugarinnar eftir lokun í síðustu viku. Reyndist þarna vera um að ræða par sem hugðist hafa það náðugt saman. Í dagbók lögreglunnar kemur hins vegar fram að parinu hafi verið vísað á brott.