Reykingamenn eyða um 14 milljörðum í sígarettur

Íslenskir reykingamenn eyða líklega um fjórtán milljörðum króna í sígarettur á ári. Venjulegur launamaður sem reykir pakka á dag, eyðir heilum mánuði á ári í að vinna fyrir sígarettum.

Sígarerettupakkinn kostar því í kringum níu hundruð kall. Sé litið í gögn frá ÁTVR, má sjá að þar fóru í gegn um sextán milljón pakkar af sígarettum í hittiðfyrra. Hafi þetta allt farið í hendur reykingamanna, þá greiddu þeir yfir fjórtán milljarða króna fyrir fíknina þetta ár. Hér er eingöngu rætt um sígarettur, en við sleppum til að mynda alveg átján tonnum af píputóbaki og vindlum.

Í stóru samhengi mætti reka lögregluna, landhelgisgæsluna, dómstólana og fangelsin, fyrir þá upphæð sem reykingamenn eyða í sígarettur.

Sá sem reykir pakka á dag, eyðir um þrjú hundruð og þrjátíu þúsund krónum í sígarettur á ári.

Fjölmennar stéttir eru með viðlíka upphæð í laun, til að mynda skrifstofufólk, verkafólk, iðnaðarmenn og fólk í þjónustu og afgreiðslu. Fólk úr þessum starfsgreinum sem reykir pakka á dag, ver um það bil mánuði á hverju einasta ári í að vinna fyrir fíkninni.

Enn eru um þrjátíu og sjö þúsund reykingamenn í landinu, átján ára og eldri, miðað við tölfræði Lýðheilsustofnunar. En þeim hefur fækkað mikið undanfarna áratugi, en þeir voru um þriðjungur landsmanna fyrir aðeins tveimur áratugum.