Hjólar í kringum landið á tíu dögum

Læknaneminn Alissa Rannveig Vilmundardóttir lagði í morgun af stað í tíu daga hjólaferð kringum landið þar sem hún hyggst hjóla til styrktar krabbameinsrannsóknum.

„Markmið mitt er að hjóla í kringum Ísland til að kynna og styrkja Rannsóknastofu í krabbameinsfræðum. Slagorð ferðarinnar er Okkar leið - allra málefni,“ segir Alissa.

Alissa lagði af stað klukkan níu í morgun. Markmiðið er að ljúka hringferðinni á tíu dögum, en Alissa gefur sér fjóra aukadaga ef þess gerist þörf. Gerir hún ráð fyrir að koma til Reykjavíkur 18. eða 19. ágúst

Söfnunarferð Alissu kringum Ísland hófst og endar við húsnæði Rannsóknastofu í krabbameinsfræðum að Læknagarði og að ferð lokinni verður athöfn þar sem Vigdís Finnbogadóttir, fyrrverandi forseti Íslands sem er verndari söfnunarinnar, afhendir skjal til marks um þá upphæð sem safnast hefur.

 

Alissa býður öllum að hjóla með sér síðustu kílómetrana til Reykjavíkur, það er úr Mosfellsbæ að Læknagarði og vonast til að fjölmenni taki þátt á síðustu metrunum og sýni með því stuðning sinn við krabbameinsrannsóknir á Íslandi og njóti léttra veitinga við ferðalok.

 

Símalína til styrktar málefninu er 904-1339. Með því að hringja í símanúmerið leggjast sjálfkrafa 1.339 krónur á reikning verkefnisins. Þetta svarar til einnar krónu á hvern kílómetra sem hjólaður er. Hægt er að skoða heimasíðu átakins hér.