Sóttu veikan mann á rússneskan togara

Þyrla Landhelgisgæslunnar, TF-LÍF, þurfti að sækja alvarlega veikan skipverja á rússneskum togara sem staddur var 260 sjómílur suðvestur af Reykjanesi. Togarinn sigldi til móts við þyrluna og stefnumótsstaðurinn var 160 sjómílur.

Haft var samband við stjórnstöð Landhelgisgæslunnar um klukkan 19 í gærkvöldi. Eftir að læknir hafði talað við skipverja um borð taldi hann bráðnauðsynlegt að senda þyrluna til móts við skipið. Þyrlan var svo lent á Reykjavíkurflugvelli klukkan 6 í morgun þar sem sjúkrabíll sótti skipverjann.

Ástæða þess að þyrlan gat sótt manninn var sú að önnur þyrla var á „stand-by". Undir öðrum kringumstæðum hefði annars ekki verið hægt að fara svo langt út á haf.