Ekki of margir í Herjólfi

„Nei, það getur ekki verið, ég hefði frétt af því," segir Sigmar Jónsson hafnarstjóri við Landeyjahöfn. Vestmannaeyingur hafði samband við fréttastofu og fullyrti að það hefðu farið helmingi fleiri um borð í Herjólf í morgun en leyfilegt er. En báturinn tekur 500 manns.

Heimamaðurinn sagði að bryggjan hefði verið full af fólki og svo hefði bara öllum verið smalað um borð í bátinn. Sigmar vísar því á bug.

„Ég horfði á liðið sem kom út úr bátnum og mér fannst ekkert meira í honum en venjulega. Það myndi sjást ef það væri helmingi fleiri um borð í bátnum þannig ég stórefast um að þetta sé rétt hjá honum," segir Sigmar.

Annars hefur allt gengið eins og í sögu segir Sigmar. „Fólk er að sjálfsögðu þreytt eftir langa helgi, en fólk er ekki ennþá ölvað."

Eyþór H Ólafsson, öryggisstjóri hjá Eimskip, segir að talið sé um borð í skipið og passað sé upp á að ekki fleiri en 525 fari um borð, en það er hámarksfjöldinn.