Yfirbugaður af öryggisverði

Öryggisvörður á frívakt yfirbugaði tæplega þrítugan mann í fíkniefnavímu sem gengið hafði berserksgang á Laugavegi og nágrenni í gærmorgun og afhenti hann lögreglu.

Maðurinn hafði gengið um Laugaveg og ógnað fólki með vígalegri keðju. Hann hafði uppi ógnandi tilburði við konu sem átti leið um götuna, en hana sakaði ekki að sögn lögreglu.

Eftir það færði maðurinn sig að útibúi Arion banka við Brautarholt þar sem hann henti grjóti í rúðu og bíla á bílaplani. Að sögn lögreglu skemmdi hann sex bíla áður en hann var yfirbugaður.- bj