Ingibjörg Sólrún: Ekki vonbrigði að fá ekki að leiða nefndina

„Nei, ég vissi alltaf að það gæti farið á hvaða veg sem var. Ég vissi að það voru svo mörg sjónarmið sem þyrfti að skoða," segir Ingibjörg Sólrún Gísladóttir, fyrrverandi utanríkisráðherra Íslands, aðspurð hvort að það séu vonbrigði að fá ekki að leiða nefnd sem mun rannsaka árás Ísraelshers á skipalest til Gaza í maí síðastliðnum. Geoffrey Palmer, fyrrverandi forsætisráðherra Nýja-Sjálands, mun vera formaður nefndarinnar.

Ingibjörgu var boðið að vera formaður nefndarinnar en svo fór að Ban Ki-moon framkvæmdastjóri sameinuðu þjóðanna, fékk Palmer í verkið. En mun hún koma eitthvað nálægt starfi nefndarinnar? „Ég get ekkert sagt til um það á þessu stigi hvernig málin standa." segir Ingibjörg.

Samkvæmt erlendum fjölmiðlum er ekki ljóst hverjir munu sitja í nefndinni með Palmer.

Nefndin á að rannsaka árás Ísraelsmanna á skipalest sem var á leið til Gaza með hjálpargögn. Að minnsta kosti níu manns létust í árásinni. Margir þjóðarleiðtogar fordæmdu árásina og kröfðust þess að hún yrði rannsökuð.

Ingibjörg sagði í samtali við Vísi fyrr í mánuðinum að málið hefði komið upp fyrir hálfgerða tilviljun. „Ég var á ráðstefnu í Madríd um málefni Palestínu og var spurð að því hvort það mætti nefna nafnið mitt og síðan var haft samband við mig frá skrifstofu Mannréttindaráðsins," sagði Ingibjörg.