Byggt með berum höndum

Viðbygging við fræðslumiðstöð íslensku góðgerðarsamtakanna Enza í Suður-Afríku er nú í fullum gangi. Engar stórtækar vinnuvélar eru notaðar við framkvæmdirnar, heldur nota verkamenn og sjálfboðaliðar að mestu leyti berar hendur við verkið.

Það var Auður Capital sem styrkti Enza um kaup á litlu húsi í Mbekweni Newrest fátækrahverfinu skammt frá Höfðaborg fyrir rúmu ári síðan. Stækkun hússins gerir það að verkum að starfsemi getur nú farið í fullan gang.

Enza samtökin styðja konur og stúlkur sem hafa þurft að gefa frá sér nýfædd börn til ættleiðingar vegna sárrar fátæktar og/eða útskúfunar. Oft hefur stúkunum verið nauðgað, en í Suður-Afríku er konu nauðgað á 17 sekúndna fresti og eru nauðganir hvergi fleiri í heiminum.

„Þarna mun fara fram kennsla fyrir Enza stúlkurnar, sem vantar sárlega þekkingu og stuðning til að komast í þau atvinnutækifæri sem eru til staðar á svæðinu," segir Unnur Steinsson, varaformaður Enza á Íslandi. „Fræðslumiðstöðin mun þó einnig þjóna öðrum konum í fátækrahverfinu, en ekki er vanþörf á að styrkja þær því afleiðingar aðskilnaðarstefnunnar eru meðal annars þær að staða kvenna er mjög veik í fátækrahverfunum."

Unnur hvetur þá sem geta lagt samtökunum lið að leggja inn á reikning félagsins, en upplýsingar um hann má nálgast á heimsíðunni enza.is. Nú þurfi bæði innréttingar og allt innbú í viðbygginguna. Mánaðarlegt framlag einstaklinga upp á nokkur hundruð krónur geti skipt sköpum fyrir reksturinn.

„Nú fyrir hlaupagarpa sem taka þátt í Reykjavíkurmaraþoninu hvetjum við auðvitað alla líka til að hlaupa í þágu Enza," segir Unnur að lokum.