Bjóða sálfræðiaðstoð vegna áfalla á atvinnumarkaði

Bandalag háskólamanna býður félagsmönnum sínum sem lenda í óvæntum starfstengdum áföllum eða starfslokum að sækja sér sálfræðitíma sér að kostnaðarlausu.

Þótt atvinnuleysi hafi margfaldast á síðustu tveimur árum segir Stefán Aðalsteinsson, framkvæmdastjóri BHM, að ásókn í þessa þjónustu hafi ekki aukist. Stefán segir að þetta tilboð eigi við um opinbera starfsmenn, það er þá sem eru í vinnu hjá ríki og sveitarfélögum.

Stefán segir að eftir að hafa skoðað tölurnar hafi það komið á óvart að það hafi ekki fjölgað í hópi þeirra sem nýta sér þetta boð. Stefán segir hins vegar að fleiri nýti sér aðstoð lögfræðings BHM en áður var. „Það er miklu meira álag á lögfræðingnum hjá okkur í tengslum við starfslok og annað slíkt," segir Stefán.