Slys við Geysi: Skjót viðbrögð fyrrverandi sjúkraflutningamanns

Skjót viðbrögð fyrrverandi sjúkraflutningamanns urðu til þess að tveggja ára stúlka, sem brenndist alvarlega við Geysi í gær, fékk rétta aðhlynningu strax eftir slysið. Hún liggur nú á gjörgæsludeild Landsspítalans. Ríkið á svæðið þar sem slysið varð, en það er ekki á ábyrgð neins ráðuneytis eða stofnunar.

Stúlkan var á göngustíg með spænskum foreldrum sínum, þegar hún féll fram yfir sig út af stígnum og ofan í frárennslið frá hvernum Strokki. Foreldrarnir, ferðamenn á svæðinu og starfsfólk á Geysi brugðust skjótt við, fluttu hana inn í starfsmannahús og hringdu í næsta lækni, sem er í Laugarási. Þá var kallað eftir sjúkarabíl frá Selfossi.

Sjúkraflutningamennirnir mundu þá að fyrrverandi starfsfélagi þeirra bjó skammt frá Geysi, og svo vel vildil til að hanhn var heima og gat farið strax á vettvang. Læknirinn kom skömmu síðar og þyrla Landhelgisgæslunnar var sett í viðbragðsstöðu til að fljúga á móti sjúkrabílnum, ef á þyrfti að halda.

Stúlkan var þegar lögð inn á Slysadeild Landsspítalans og flutt þaðan á gjörgæsluldeild, þar sem hún er enn. Ekki fengust nánari fréttir af líðan hennar nú fyrir hádegið, en hún hlaut annars stigs bruna á höndum, andliti og brjósti.

Ríkið keypti á sínum tíma spildu á hverasvæðinu, þar sem slysið varð, en samkvæmt athugun Fréttastofu í morgun telur ekkert ráðuneyti eða stofnun svæðið á sinni ábyrgð og í raun virðist því engin opinber aðili hafa umsjón með svæðinu. Þá er engin neyðaráætlun til, sem sett yrði í gang við svona slys.

Merkingar og leiðbeinandi snúrur eru að ganga úr sér og vantar orðið sumstaðar. Hinsvegar er Umhverfisstofnun þessa dagana, að frumkvæði sveitarfélagsins Bláskógabyggðar, að móta hugmyndir að öryggismálum á svæðinu, en án þess að svæðið sé á forræði stofnunarinnar og án beinnar fjárveitingar til verksins.