Dópaður undir stýri með barn í bílnum

Lögreglan á höfuðborgarsvæðinu stöðvaði mann um helgina en hann hafði ekið undir áhrifum fíkniefna. Barn mannsins var í bílnum að því er fram kemur í tilkynningu en ökumaðurinn hafði áður verið sviptur ökuréttindum. Alls voru fimm ökumenn teknir á höfuðborgarsvæðinu fyrir að aka undir áhrifum fíkniefna um helgina.

Tveir voru stöðvaðir í Reykjavík og Kópavogi og einn í Hafnarfirði. Þetta voru þrjár konur og tveir karlar en fólkið er allt á þrítugsaldri. Tveir þessara ökumanna höfðu þegar verið sviptir ökuleyfi.

Þá voru tólf ökumenn teknir fyrir ölvunarakstur á höfuðborgarsvæðinu um helgina, ellefu í Reykjavík og einn í Kópavogi. Tveir voru teknir á laugardag, níu á sunnudag og einn aðfaranótt mánudags. Þrír þessara ökumanna höfðu þegar verið sviptur ökuleyfi.