Kertafleyting á Akureyri

Samstarfshópur um frið stendur fyrir kertafleytingu á Akureyri næstkomandi fimmtudagskvöld til að minnast þess að 65 ár eru liðin frá því að kjarnorkusprengjum var varpað á japönsku borgirnar Hirosima og Nagasaki. Athöfnin verður haldin við Minjasafnstjörnina á Akureyri og hefst klukkan 22. Ávarp flytur Björn Þorláksson, bæjarlistamaður Akureyrar.

„Gleymum aldrei fórnarlömbum sprengjanna í Hiroshima og Nagasaki fyrir 65 árum. Mótmælum jafnframt þeim hernaðaryfirgangi stórvelda sem enn viðgengst. Mætum tímanlega framan við Minjasafnið og verðum okkur úti um flotkerti sem fást á staðnum," segir í tilkynningu frá skipuleggjendum.

Mikill fjöldi fólks kom saman við Reykjavíkurtjörn í gærkvöldi til að minnast fórnarlamba kjarnorkuárásanna á Japan.