Leikskólaplássum fjölgað í Norðlingaholti

Þrjátíu ný leikskólapláss verða til í Norðlingaholti um miðjan september þegar opnuð verður ný deild við leikskólann Rauðhól að Sandavaði 7, en brýn þörf er í hverfinu fyrir leikskólapláss fyrir börn sem verða tveggja ára á árinu að því er fram kemur í tilkynningu frá Reykjavíkurborg.

Nýja leikskóladeildin verður í húsnæði sem Norðlingaskóli hefur hingað til haft til afnota, en starfsemi grunnskólans er að færast yfir í nýja skólabyggingu. Með nýrri deild verða til 30 ný leikskólapláss í Norðlingaholti, til viðbótar við þau 106 sem fyrir eru í Rauðhól.

„Verið er að kanna hvort foreldrar í Norðlingaholti, sem þegar hafa fengið boð um leikskóladvöl í leikskólum í Árbæ, vilji nýta sér þennan nýja valkost í hverfinu. Þá hafa leikskólastjórar í Árbæ og starfsmenn í þjónustumiðstöð hverfisins verið upplýstir um fjölgun leikskólarýma í Norðlingaholti því það mun hafa nokkur áhrif á innritun í alla leikskóla í Árbænum," segir ennfremur.