Svínaflensan: Viðbúnaðarstig lækkað

Viðbúnaðarstig vegna svínainflúensu hefur verið lækkað hér á landi. Í tilkynningu á vef Landlæknisembættisins segir að þann 10. ágúst síðastliðinn hafi Alþjóðaheilbrigðismálastofnunin lýst því yfir að heimsfaraldur inflúensu væri genginn yfir og viðbúnaðarstig vegna faraldursins yrði því lækkað. Jafnframt hvetur stofnunin til ýtrustu árvekni því reynslan hefur sýnt að heimsfaraldrar ganga yfir í síðari bylgjum sem erfitt er að spá fyrir um.

„Í ljósi þessa hefur verið ákveðið að lækka viðbúnaðarstig hér á landi frá hættustigi niður á óvissustig," segir í tilkynningunni. „Samkvæmt því verða engar sérstakar aðgerðir viðhafðar hér á landi vegna svínainflúensunnar aðrar en þær að áfram verður fylgst með útbreiðslu og afleiðingum sýkinga af hennar völdum hér á landi og erlendis til að hægt verði að grípa til frekari ráðstafana með litlum fyrirvara ef þurfa þykir."

Þá segir ennfremur að búast megi við því að svínainflúensan muni á næstu árum ganga sem árleg inflúensa en hún muni væntanlega ekki valda umfangsmiklum faraldri hér á landi eins og haustið 2009, þökk sé útbreiddri bólusetningu, en um 50% Íslendinga hafa nú verið bólusettir.

„Vakin er athygli á að hér á landi er til nægilegt bóluefni gegn svínainflúensu sem hægt verður að nota ef ástæða þykir til," segir að lokum.