Spaugstofan kostaði 81 milljón

Spaugstofan kostaði Ríkisútvarpið 81 milljón í hitteðfyrra samkvæmt tölum sem komu fram í sundurliðuðu svari Katrínar Jakobsdóttur mennta- og menningarmálaráðherra við fyrirspurn Guðlaugs Þórs Þórðarsonar, þingmanns Sjálfstæðisflokksins, í vetur. Til samanburðar kostaði rekstur fréttastofunnar 1100 milljónir. Stundin okkar kostaði 38 milljónir og Útsvar 30 milljónir.

Þorgrímur Gestsson, formaður Hollvina Ríkisútvarpsins, segir að hann eigi eftir að sjá á eftir Spaugstofunni og hann voni að þeir standi við það að þeir verði einhversstaðar. „Laugardagskvöldin verða ekki svipur hjá sjón," segir Þorgrímur. Hann segir þó að það hafi mátt búast við þessu. „Þeir þurfa víst að spara," segir Þorgrímur sem segist vonast til þess að það komi eitthvað í staðinn fljótlega.

Þorgrímur sér ekki eins mikið eftir HM í handbolta. Tilkynnt var í dag að Stöð 2 hefði tryggt sér sýningarrétt á næstu tveimur mótum. „Prívat og persónulega sé ég ekkert eftir honum," segir Þorgrímur. Hann er hins vegar sammála mennta- og menningarmálaráðherra í því að dagskrárefni eins og sýningar frá landsleikjum Íslands eigi að vera öllum opið. „Þetta er efni sem allir eiga rétt á að fylgjast með. Sama hvort þeir borga fyrir áskriftarstöð eða ekki," segir Þorgrímur.