Vilja ekki sjá hvalveiðarnar

„Ég hélt að þetta væri grín,“ segir Rannveig Grétarsdóttir, framkvæmdastjóri Eldingar, sem býður upp á hvalaskoðun á Faxaflóa. Fréttablaðið greindi frá því í gær að hvalveiðimenn í Kópavogi ætli að bjóða upp á hvalaskoðun á hvalveiðibátum samhliða hvalveiðum.

Ekki er ætlunin að stunda hvalveiðar á bátnum heldur sýna gestum hvernig veiðarnar fara fram. Rannveig á sæti í Hvalaskoðunarsamtökum Íslands, sem gagnrýndu fyrir rétt rúmu ári hvalveiðar nálægt hvalaskoðunarsvæðum. Hún segir marga um hituna í hvalaskoðun, fimm fyrirtæki geri út frá Reykjavík. Erlendir ferðamenn hafi almennt ekki sýnt áhuga á hvalveiðum, hvað þá hvernig þær fari fram.

„Ég fæ nokkrar fyrirspurnir á ári um hvalveiðiskoðun. Þær eru allar frá Íslendingum,“ segir hún. „En það er gaman að þeir vilji prófa eitthvað nýtt. Ég fagna allri nýsköpun.“ - jab