Norskir ferðamenn eyða mestu á Íslandi

Ferðamenn sem komið hafa til Íslands í ár eyða minna en þeir sem komu síðastliðin tvö ár. Þetta segir Helgi Hrannar Jónsson, framkvæmdastjóri Global Blue, sem annast Tax Free á Íslandi.

Samkvæmt tölum Global Blue eru það Norðmenn sem versla mest ferðamanna hér á landi, en þeir hafa verslað fyrir rúmlega tuttugu prósent meira í ár en í fyrra. Danir eru í öðru sæti en þeir hafa minnkað verslun, og hafa verslað fyrir rúmlega tuttugu prósent lægri upphæðir nú en í fyrra. Athygli vekur að Kanadabúar hafa verslað tíu prósentum meira í ár en í fyrra og segir Helgi að aukin tíðni flugs til og frá Kanada geti verið ástæða þess.

Eldgosið í Eyjafjallajökli hefur sett strik í reikninginn. „Sé fyrri hluti þessa árs tekinn saman þá er tímabilið fram að gosi ótrúlega gott, og á þeim tíma var töluverð aukning í sölu til erlendra ferðamanna að teknu tilliti til verðbólgu.“ Helgi segir þetta hafa gefið góð fyrirheit um sumarið en það hafi ekki gengið eftir þegar eldgosið varð. „Reyndar má segja sem svo að sú aukning sem hafði átt sér stað hefur jafnast út.“

Árið 2009 var metár í ferðamennsku á Íslandi og eyddu ferðamenn að meðaltali 90 prósentum meira fyrri hluta ársins en á sama tíma árið áður. Ferðamenn virðast nú vera að fara aftur í gamalkunnugt munstur, að skoða náttúruna meira og kaupa minna. Þá virðist ferðamönnum sem koma í styttri ferðir vera að fækka. „Ferðamenn eyða lægri upphæðum að meðaltali í hvert skipti. Styrking krónunnar hefur líka töluvert að segja enda hefur hún styrkst um meira en tíu prósent samanborið við sama tíma í fyrra,“ segir Helgi. Hann segist telja að þegar árið verði tekið saman muni fækkun ferðamanna og styrking krónunnar sýna lítilsháttar samdrátt á markaði. Það sé ágætis niðurstaða sé tillit tekið til þessara þátta.

Helgi segir íslenska kaupmenn hafa staðið sig gríðarlega vel undanfarin ár og þeir stuðli að góðu framboði, háu þjónustustigi og sanngjörnu verðlagi miðað við nágrannalöndin. Vöxtur í íslenskri hönnun hafi einnig verið mikill. „Íslensk kaupmannastétt hefur allt frá hruni unnið þrekvirki í að bjóða gott úrval og gott verð.“

thorunn@frettabladid.is