Björguðu manni úr jökulá

Litlu mátti muna að illa færi þegar að björgunarsveitir Slysvarnafélagsins Landsbjargar björguðu manni úr jökulá fyrir norðan Jökulheima vestan við Vatnajökul á átjánda tímanum í kvöld.

Tvær björgunarsveitir sem taka þátt í hálendisvaktinni Hjálparsveit skáta í Reykjavík og Björgunarsveitin Núpar frá Kópaskeri fóru í björgunina en þær voru staddar á Sprengisandsleið og við Landmannalaugar.

Maður hafði ekið fjórhjóli út í jökulá sem kemur úr Sylgjujökli í Vatnajökli og festist hjólið. Ferðafélagi mannsins hafði samband við Neyðarlínu og óskaði eftir aðstoð. Sá sem var á hjólinu út í ánni þurfti að bíða eftir björgun í um þrjá tíma.

Nokkurn tíma tók að staðsetja óhappið þar sem fullnægjandi upplýsingar lágu ekki fyrir um staðsetningu. Þegar björgunarsveitir komu á svæðið var hafist handa við að bjarga manninum úr ánni og gekk það greiðlega fyrir sig.

Ekki mátti tæpara standa því maðurinn var orðinn kaldur og hrakinn eftir dvöl sína á hjólinu í köldu jökulvatninu í meira en þrjár klukkustundir. Um leið og hann var kominn á land var hann settur í þurr föt og hlúið að honum. Maðurinn hressist fljótt og var hjólinu bjargað úr ánni. Björgunarsveitirnar eru nú á leið til byggða ásamt leiðangursmönnum og gengur ferðin vel.

Í tilkynningu frá Landsbjörg segir:

„Hálendisvakt björgunarsveitanna hefur oft sannað það hversu miklu máli það skiptir að hafa viðbragð á hálendinu yfir aðal ferðamannatíman því það styttir allt viðbragð mikið þegar slys eða óhöpp verða á hálendinu.

Björgunarsveitir sinna hálendisvaktinni á fjórum stöðum á landinu en það er í Landmannalaugum, Nýjadal á Sprengisandsleið, á Hveravöllum á Kili og í Öskju.

Aukin útbreiðsla GSM símakerfisins hefur enn og aftur sannað gildi sitt þegar kemur að öryggi ferðamanna á hálendi Íslands því útbreiðslan hefur aukist stórlega á hálendinu undafarið. "