Alþingi gæti stöðvað aðgerðir ríkisstjórnarinnar

Alþingi gæti meinað ríkisstjórninni að endurfjármagna íslenska bankakerfið ef til þess kemur, að því er fram kemur á fréttaveitunni Bloomberg.

Mikil óvissa hefur verið um eiginfjárstöðu bankakerfisins eftir að gengistryggð lán voru dæmd ólögmæt, og haft hefur verið eftir ráðamönnum að hugsanlega gæti þurft að leggja bönkunum til aukið eigið fé.

Þrjátíu og fjórir þingmenn af 63 eru sagðir munu leggjast gegn hvers kyns tillögum ríkisstjórnarinnar um opinbert framlag til fjármálastofnana.

Í þeirra hópi eru allir stjórnarandstöðuþingmennirnir, auk þeirra Guðfríðar Lilju, Ögmundar Jónassonar og Lilju Mósesdóttur úr Vinstri Grænum.