Reyndi að blekkja lögreglumenn

Karlmaður var nýverið dæmdur í hálfsárs skilorðsbundið fangelsi og sviptur ökuleyfi í ár fyrir að aka án réttinda og reyna að blekkja lögreglumenn. Maðurinn sem er 33 ára gamall átti að afhenda ökuskírteini sitt þegar hann var sviptur ökuréttindum en það gerði hann hins vegar ekki og bar því við að hafa týnt ökuskírteininu. Þegar lögreglumenn stöðvuðu hann eftir sviptinguna framvísaði hann umræddu ökuskírteini.

„Með þessu framferði braut maðurinn 1. mgr. 157. gr. hegningarlaga sem er svona: Noti maður ófalsað skjal svo sem það varðaði annan mann en þann, sem það á við, eða með öðrum hætti gagnstætt því, sem til var ætlast, og þetta er gert til þess að blekkja með því í lögskiptum, þá varðar það sektum …1) eða fangelsi allt að 6 mánuðum," segir í dagbók lögreglunnar á Selfossi.

Maðurinn var því bæði ákærður fyrir að aka bifreiðinni án ökuréttinda og fyrir að hafa reynt að blekkja lögreglumenn. Héraðsdómur Suðurlands sakfelldi manninn fyrir bæði brotin í síðustu viku.