Stöðugt augnsamband virkar á fyrsta stefnumóti

Sex and the City stjarnan, leikkonan Kim Cattrall, segir að öruggasta leið karlmanna að konum er að halda stöðugu augnsambandi.

Leikkonan, sem á þrjú misheppnuð hjónabönd að baki segist vita hvað virkar best í samskiptum kynjanna við fyrstu kynni að minnsta kosti.

Hún segir yfirborðskennt mas engan veginn virka vel á konur heldur hrein og tær athygli eða með öðrum orðum algjör þögn.

„Ég held að það besta sem karlmenn geta gert á fyrsta stefnumóti er að segja alls ekki neitt. Þeir eiga einfaldlega að þegja og hlusta," sagði Kim spurð hvernig karlar geta gengið í augun á konum.

„Stöðugt augnsamband er ansi öflugt en þeir mega ekki reyna of mikið á sig þegar kemur að augunum. Svo eru pikköpplínur stranglega bannaðar. Fallegt bros og góð nærvera sem sýnir að þeir hafi einhvern áhuga er mér að skapi," sagði Kim sem er vissulega reynslunni ríkari þegar kemur að karlmönnum.