Verkfallið skapar álag á slysadeild

Aukið álag er á slysadeild Landspítalans i Fossvogi vegna verkfallsins, samkvæmt upplýsingum sem Vísir fékk frá hjúkrunarfræðingi á deildinni.

Eins og komið hefur fram í fjölmiðlum í dag hófst sextán klukkustunda verkfall slökkviliðs- og sjúkraflutningamanna í morgun. Verkfallið hefur þau áhrif að sjúkraflutningar á milli sjúkrastofnana leggjast að mestu af. Þetta skapar aukið álag á margar sjúkradeildir, til dæmis slysadeild, en sótt hefur verið um undanþágur fyrir flutningum í nokkrum tilfellum. Þá hafa sjúkraflutningamenn sinnt bráðaflutningum sem krefjast ekki undanþága.

Hjúkrunarfræðingur á slysadeildinni sem Vísir talaði við sagði að mikið álag væri á deildinni í kvöld. Þó að verkfall sjúkraflutningamanna væri einn þeirra þátta sem orsökuðu álagið, þá væru aðalorsakirnar aðrir stærri þættir.