Búðarhálsvirkjun gefi af sér arð strax frá upphafi

5. maí 2010 05:30

Búðarhálsvirkjun. Unnið er að fjármögnun virkjunarinnar við erfiðar aðstæður á markaði og viðræður um endurskoðun orkusölusamnings við RioTintoAlcan, sem rekur álverið í Straumsvík, standa nú yfir. Myndin er tekin á kynningu Landsvirkjunar í febrúar en þar var Katrín Júlíusdóttir iðnaðarráðherra.

Fréttaskýring: Hvernig gengur Landsvirkjun að fjármagna Búðarhálsvirkjun?

„Þetta er puð,“ segir Hörður Arnarson, forstjóri Landsvirkjunar, um stöðu og horfur í fjármögnunarmálum fyrirtækisins.

Fjármögnun Búðarhálsvirkjunar er ólokið og endanlegur orkusölusamningur liggur ekki fyrir þótt framkvæmdir séu hafnar. Hörður segir að fyrirtækið komi ekki að luktum dyrum á erlendum fjármagnsmörkuðum en „dyrnar eru heldur ekki galopnar“.

Hann segist vongóður um að lausn finnist og fjármögnun ljúki svo hægt verði að bjóða út næstu áfanga framkvæmda við virkjunina. „Það eru ýmsir möguleikar sem við erum að vinna að með lífeyrissjóðum og fjölmörgum bönkum,“ segir Hörður.

Vextir verði sjálfsagt fyrst í stað hærri en var árin 2006-2008. Ekki verði þó gerðir samningar sem byggist á öðru en því að Búðarhálsvirkjun gefi af sér arð frá upphafi.

Lífeyrissjóðirnir hafa gefið vilyrði um þátttöku í fjármögnun innlends kostnaðar vegna Búðarhálsvirkjunar, að sögn Arnars Sigurmundssonar, formanns Landssambands lífeyrissjóða. Sá kostnaður nemur um 10 milljörðum. Viðræður hafa þó ekki átt sér stað frá því fyrir áramót, segir Arnar. Þær hefjist á ný þegar fjármögnun erlends kostnaðar er lokið og samningur um langtímasölu á orku liggur fyrir.

Landsvirkjun og RioTintoAlcan (RTA) eiga enn í viðræðum um kaup og sölu á raforku frá Búðarhálsvirkjun. Ráðgert hefur verið að nýta orkuna þaðan til þess að auka straum í álverinu í Straumsvík en þannig má auka framleiðslugetu um allt að 45.000 tonn af áli á ári.

Hvorki Hörður né Ólafur Teitur Guðnason, framkvæmdastjóri samskiptasviðs RTA á Íslandi, vildu tjá sig um stöðu og gang mála í samningaviðræðunum.

Landsvirkjun greindi frá því á vef sínum í ágúst 2008 að viðræðum væri lokið með samkomulagi um orkusölu sem tryggði rekstur álversins til 2027.

Spurður hvers vegna viðræður hófust að nýju sagði Hörður að fyrirvarar um fjármögnun, samþykki stjórnar og fleira hefðu ekki verið uppfylltir og gagnkvæmur skilningur hefði verið á því að nýjar viðræður væru nauðsynlegar. Landsvirkjun hefði haft frumkvæði að þeim.

peturg@frettabladid.is

Mest lesið

Fleiri fréttir