Illa gengur að fjármagna stóriðju - Katrín bendir á lífeyrissjóðina

Illa gengur að fjármagna stóriðjuframkvæmdir vegna tregðu lífeyrissjóðanna til að fjárfesta í íslenska orkugeiranum.

Þetta segir Katrín Júlíusdóttir, iðnaðarráðherra. Hún vísar þeirri gagnrýni forseta ASÍ á bug að ríkisstjórnin sé ekki gera sitt í atvinnumálum.

Forseti ASÍ telur að horfur í atvinnumálum séu dökkar á síðara hluta þess árs. Í fréttum stöðvar tvö í gær gagnrýndi hann ríkisstjórnin fyrir framtaksleysi og vísað sérstaklega til stóriðjuframkvæmda.

Iðnaðarráðherra vísar þessar gagnrýni á bug og bendir meðal annars á fyrirhugaðar framkvæmdir við Búðarhálsvirkjun sem eiga að hefjast í sumar. Hins vegar gangi illa að fjármagna öll verkefni.

„Það er alveg rétt þegar kemur að stóriðjunni þá hefur fjármögnun verið til trafala og þá ekki síst í orkugeiranum og mér finnst við líka þurfa staldra aðeins við og fara yfir það hvers vegna lífeyrirssjóðirnir eru jafn tregir eins og nýleg dæmi sýna að fara inn í orkugeirann líkt og varðandi orkuveitu reykjavíkur og líka HS orku og það er eitthvað sem við þurfum að fara vandlega yfir," segir Katrín Júlíusdóttir iðnaðaráðherra.

Samtök atvinnulífsins sögðu sig frá stöðugleikasáttmálanum í vetur en ráðherra kallar eftir samstöðu.

„Við þurfum að kalla alla þessa aðilar að borðinu og fara yfir stöðuna en það þurfum við að gera í sameiningu en ekki í hnútukasti í fjölmiðlum," segir Katrín að lokum.