Svangir landhelgisgæslumenn lentu á þyrlu á Sauðárkróki

Svangir landhelgisgæslumenn lentu rétt í þessu við miðbæ Sauðárkróks eða nánar tiltekið á bak við Þreksport samkvæmt vefnum Feykir.is.

Bæjarbúar þustu niður í bæ til að sjá hvar væri í gangi því helst héldu menn að þyrlan væri biluð því áður en hún lenti sveimaði hún góða stund eftir heppilegum lendingarstað.

Gæslumenn stukku síðan glaðbeittir út úr þyrlunni en þegar þeir voru spurðir ástæðu ferðalagsins var svarið; -Við vorum svangir.

Eftir að hafa leyft börnum og fullorðnum að svala forvitni sinni héldu gæslumenn að svala hungrinu áður en vegaeftirlitið heldur áfram. Þess ber að geta að þeir lögðu þyrlu sinni 200 metrum frá veitingastað bæjarins.

Einn íbúi sem Vísir talaði við sagði uppákomuna frekar skemmtilega og líkti þessu við að ef þyrlan hefði lent á Austurvelli í miðborg Reykjavíkur.