Vilja póstsamskipti Jóhönnu við Láru vegna launamáls seðlabankastjóra

Fulltrúar minnihlutans í efnahags- og skattanefnd Alþingis hafa óskað eftir að sjá tölvupóstsamskipti forsætisráðuneytis og formanns bankaráðs Seðlabankans þar sem launamál Seðlabankastjóra eru rædd. Þingmenn vilja fá úr því skorið hvort forsætisráðherra hafi sagt sannleikann í málinu.

Deilt er um það hvort starfsmenn forsætisráðuneytisins hafi gefið Má Guðmundssyni, seðlabankastjóra, fyrirheit þegar hann var ráðinn á sínum tíma um að laun hans yrðu ekki skert í samræmi við stefnu ríkisstjórnarinnar.

Lára V. Júlíusdóttir, formaðu bankaráðs Seðlabankans, vísaði í þessi fyrirheit þegar hún lagði fram þá tillögu í bankaráði Seðlabankans að laun bankastjóra yrðu hækkuð um 400 þúsund krónur.

Hér greinir menn á því forsætisráðherra hefur ítrekað vísað því á bug að hún eða starfsmenn ráðuneytisins hafi gefið slíkt loforð.

Lára V. kom fyrir efnahags- og skattanefnd Alþingis í morgun og í kjölfarið óskaði minnihlutinn eftir því að fá aðgang að tölvupóstum milli hennar og forsætisráðuneytisins.

Þingmaður Sjálfstæðisflokksins, Tryggvi Þór Herbertsson, segir grafalvarlegt ef í ljós kemur að forsætisráðherra hafi farið með ósannindi í málinu.

„Það er ljóst ef að Má hafa verið gefin þessi fyrirheit úr forsætisráðuneyti og að forsætisráðherra segir að hvorki hún né hennar fólk hafi gefið þessi fyrirheit þá er ljóst að það er einhver að segja ósatt miðað við þetta þá er hægt að færa sönnur á það í tölvupóstssamskiptum," segir Tryggvi Þór.