Slæmt skyggni við Hvolsvöll

Skyggnið við Hvolsvöll og nágrenni er mjög slæmt um þessar mundir vegna öskufoks. Lítil virkni er nú við Eyjafjallajökull en jarðvísindamenn Veðurstofu Íslands og Almannavarnir segja enn oft snemmt að lýsa yfir goslokum. Vegagerðin varar fólk við öskufoki á Sólheimasandi í dag.

Lögreglan á Hvolsvelli segir skyggni þar nú mjög slæmt vegna öskufoks. Þótt ekki sé öskufall þurfi lítinn vind til þess að fíngerð askan þyrlist upp og skyggni verði aðeins um 500 metrar.

Vegagerðin sendi frá sér tilkynningu í morgun þar sem varað er við öskufoki á Sólheimasandi að Pétursey.

En hver er staðan nú? „Það er í sjálfu sér mjög lítil virkni og eingöngu gufa sem kemur upp. Það er ennþá smá órói og hann er ekki orðinn eins og hann var áður. Það eru ennþá að koma smáskjálftar en þeir eru ekki djúpir,“ segir Gunnar Guðmundsson, jarðeðlisfræðingur á Veðurstofu Íslands.

Jarðvísindamenn segja öskufallið sem orðið hefur frá Eyjafjallajökli meira en það var í síðasta gosi sem stóð yfir á árunum 1821 og 1822. Þá fór eldfjallið í nokkra mánaða dvala en byrjaði svo aftur að gjósa. Óttast vísindamenn að svipað kunni að gerast nú?

„Það er ekki hægt að útiloka að það geti tekið sig upp aftur. Við erum búin að sjá innskotavirkni þarna frá 1994 og það hafa komið hlé á milli. Það er ekki hægt að útiloka að það haldi áfram. Eins og staðan er núna eru líkur á að virknin hætti,“ segir Gunnar.