Þúsundir samankomnar á Unglingalandsmóti

„Þetta er alveg glymrandi. Það hefur allt verið á áætlun og allir voða kátir og glaðir. Bæði þjálfarar, keppendiur, foreldrar og aðrir gestir," segir Helga Guðrún Guðjónsdóttir. Þrettánda Unglingalandsmót Ungmennafélags Íslands fer nú fram í Borgarnesi. Helga Guðrún segir að allt gangi gangi vel. „Þannig að við brosum bara í hring. Öll sem eitt," segir Helga.

Helga Guðrún segir að um 10-15 þúsund gestir séu á mótssvæðinu en þar af eru 1740 keppendur á aldrinum 11-18 ára. Veðrið leikur við keppendur og mótsgesti og fjölgar gestum jafnt og þétt. Lögreglan hvetur ökumenn að fara varlega, virða umferðareglur og leggja bifreiðum á merktum svæðum. Þannig geti umferðin gengið sem best.

Keppni í knattspyrnu og frjálsum íþróttum hófst í dag og hafa 3-4 þúsund áhorfendur fylgst með keppninni í blíðskaparveðri. Mótið verður svo sett formlega á íþróttavellinum í kvöld klukkan átta. Fyrr í dag var afhjúpaður bautasteinn sem verður nokkurs konar minnisvarði um mótið í Borgarnesi. Fyrir er annar bautasteinn en hann er minnisvarði um Landsmótið sem haldið var í Borgarnesi 1997.