Sóley Tómasdóttir: Besti flokkurinn genginn stóriðjunni á hönd

Sóley Tómasdóttir, borgarfulltrúi VG, segir að Besti flokkurinn sé genginn til liðs við það sem hún kallar stóriðjuarm Samfylkingarinnar. Þá segir hún að fulltrúar Samfylkingarinnar í borgarstjórn standi ekki með eigin ráðherra.

Á fundi borgarráðs í dag var samþykkt umsögn borgarlögmanns um frumvarp iðnaðarráðherra til laga um verndnar- og nýtingaráætlun vegna virkjunar fallvatna og háhitasvæða. Sóley segir í tilkynningu að meirihluti Samfylkingarinnar og Besta flokks hafi samþykkt umsögnina þar sem fram komi talsverður ákafi gagnvart rannsóknum og orkunýtingu á friðlýstum svæðum þvert á áform ríkisstjórnarinnar. Hún segir að fulltrúar meirihlutans hafi rökstutt afstöðu sína með því að orkurannsóknir gætu leitt til aukins verndargildis til framtíðar.

Sjálf segist Sóley ekki kannast við orkurannsóknir sem hafi hagsmuni friðlýstra svæða að leiðarljósi. Þvert á móti séu orkurannsóknir ætíð unnar vegna hagsmuna orkufyrirtækja með nýtingu viðkomandi svæðis í huga.

Sóley segir að afstaða Samfylkingarinnar veki upp spurningar um stefnu flokksins í umhverfis- og náttúruverndarmálum sem sé flaggað eftir hentugleika.

„Að sama skapi er sorglegt að Besti flokkurinn skuli slást í lið með stóriðjuarmi Samfylkingarinnar í að lítilsvirða friðlýsingar og náttúruvernd undanfarinna áratuga og ómetanleg svæði á borð við Öskju, Fjallabak og Vonarskarð. Betur hefði farið á því að flokkur sem gefur sig út fyrir umhverfisvernd stæði með náttúrunni og þeim svæðum sem hafa hlotið þann sess sem þeim ber," segir Sóley.