Bruninn á Laugavegi líklega af mannavöldum

Líklegt þykir að eldur sem kom upp í húsi á Laugavegi fjögur í morgun hafi verið af mannavöldum. Mildi þykir að ekki fór verr en mikill eldsmatur er í húsinu sem er eitt af þeim sem Reykjavíkurborg keypti á sínum tíma og stendur til að gera upp í upprunalegri mynd. Verkstjóri sem var að mæta til vinnu sá reyk á annari hæð og kallaði strax á slökkvilið.

Reykkafarar fóru inn í húsið og í ljós kom að eldur logaði í trélistum og öðru spýtnabraki á hæðinni. Vel gekk að slökkva eldinn. Vaktstjóri hjá slökkviliði Höfuðborgarsvæðisins segir að rannsókn á upptökum eldsins sé ekki lokið en að líklega hafi verið um íkveikju að ræða.

Skömmu síðar var slökkviliðið kallað að Bláfjallaafleggjara þar sem framkvæmdir standa nú yfir. Þar stóð hjólagrafa í ljósum logum. Þar eru eldsupptök heldur ekki ljós en enginn var á svæðinu þegar slökkvilið bar að garði.