Slóvenskur rokkari málar hraun

„Hraunið er mér innblástur,“ segir slóvenski myndlistarmaðurinn Jurij Asl Kelhar sem nú sýnir verk sín í Reykjavík Art galleríinu við Skúlagötu. „Ég komst að því að amma mín og afi eru íslensk – þau fluttu til Slóveníu á sínum tíma – og þess vegna meðal annars kom ég hingað. Ég hrífst af hrauni, bæði þegar það er rauðglóandi og líka þegar það er kalt og storknað. Ég stefni að því að halda fleiri sýningar hér á næstunni og það verða líka myndir af hrauni. Það er það eina sem kemst að hjá mér!“

Júríj er 37 ára gamall jarðfræðingur og félagsfræðingur. Hann hefur víða komið við, meðal annars tengst rokkinu. „Ég var söngvari í dauðarokkshljómsveit í Slóveníu á 9. áratugnum, en við vorum ekkert sérlega góðir svo ég fór fljótlega að einbeita mér að því að skrifa um dauðarokk í tímarit sem hét No Name. Það var eiginlega fyrsta tímaritið í heiminum sem skrifaði eingöngu um dauðarokk og var dreift um allan heim.“

Eftir dauðarokkið gekk Júrij til liðs við þekktustu hljómsveit Slóveníu, iðnaðarrokkbandið Laibach, sem spilaði á Íslandi 2006. Hann vann einnig náið með listahreyfingunni NSK (Neue Slowenische Kunst) sem grafískur hönnuður og fleira. Sýning Jurij stendur yfir út þessa viku og er opin daglega á milli kl. 14 og 17. Í galleríinu fer einnig fram sýning á verkum Laufeyjar Johansen, sem málar sýnir frá plánetunni Vúlkan. - drg