Gengjaátök í fangelsunum

Brotamenn sem afplána í íslenskum fangelsum mynda í auknum mæli hópa, sem síðan lenda í átökum innan fangelsisveggjanna. Þetta segir Páll E. Winkel, forstjóri Fangelsismálastofnunar.

„Við sem vinnum í fangelsiskerfinu höfum orðið vör við það með mjög greinilegum hætti síðastliðin tvö ár hve ákveðin gengjamyndun á sér stað í fangelsunum,“ segir hann. „Það má meðal annars rekja til þess að fleiri útlendingar afplána nú hér en áður. Það má einnig rekja til þess að þetta er harðari hópur manna sem stendur vel saman. Þetta eru menn sem hafa verið saman í skipulagðri brotastarfsemi og flestir þeir einstaklingar sem hana stunda fara í sama fangelsið. Við skynjum aukna hörku í þessum heimi.“

Páll segir viðbrögð fangelsisyfir­valda við þessari óheillaþróun hafa verið þá að auka öryggisbúnað starfsfólks í fangelsum. Meðal annars hafi verið keyptur nýr öryggisbúnaður fyrir sérsveit fangavarða og Tetrakerfi hafi verið tekið upp.

„Við höfum jafnframt rekið okkur á að það kemur til átaka milli þessara hópa innan fangelsisins. Það er þá okkar verkefni að tryggja öryggi annarra fanga með því að skilja þessa hópa að,“ útskýrir Páll. Vegna þess hve fangelsin séu fá og flest mjög lítil sé erfitt að skilja fangana að með fullnægjandi hætti þegar þeir séu orðnir svo margir saman. „En við gerum okkar besta í því efni.“

Páll segir að telji gengin sig eiga óuppgerðar sakir hvert við annað sé látið til skarar skríða. „Og þá er um að ræða átök sem fela í sér alvarlegt ofbeldi og þar sem tiltækum verkfærum er beitt,“ segir Páll. Hann segir dæmi um að menn hafi slasast illa.

Páll segir hópana samanstanda af íslenskum og erlendum brotamönnum í bland. - jss