Síðasta Love Parade gangan

Í ljós hörmunganna í Love Parade göngunni í Duisburg hafa skipuleggjendur hátíðarinnar ákveðið að halda gönguna ekki aftur. 19 létust og 340 slösuðust þegar múgæsing greip um sig í undirgöngum sem lágu að hátíðarsvæðinu.

„Ástargangan hefur alltaf verið friðsamlegur og gleðilegur viðburður en þetta slys mun varpa skugga á hátíðina í framtíðina. Af virðingu við ættingja og vini þeirra sem létust munum við ekki halda áfram með Ástargönguna í framtíðinni. Þetta var síðasta ástargangan," sagði Rainer Schaller skipuleggjandi hátíðarinnar á blaðamannafundi í dag.