Sakborningar svara spurningum vestra

Sakborningar í málshöfðun slitastjórnar og skilanefndar Glitnis á hendur sjö fyrrum eigendum og stjórnendum Glitnis fyrir dómi í Bandaríkjunum þurfa undir lok þessa mánaðar að mæta til New York og gefa munnlegan vitnisburð vegna frávísunarkröfu sinnar á málið.

Farið var fram á frávísun á þeim grundvelli að bandarískir dómstólar hefðu ekki lögsögu í málinu og vegna þess óhagræðis sem það hefði í för með sér fyrir sakborningana að reka mál sitt vestra. Þetta kemur fram í málsskjölum sem birt hafa verið á vef dómstólsins.

Jón Ásgeir Jóhannesson og sex aðrir fyrrum eigendur og stjórnendur Glitnis banka eru í stefnu skilanefndarinnar krafðir um sem nemur 260 milljörðum íslenskra króna fyrir að hafa staðið að meintu samsæri um að svíkja lánsfé út úr bankanum til að nota í eigin fyrirtæki. Málshöfðunin vestra byggir á því að meint brot sjömenninganna beinist gegn hagsmunum bandarískra lögaðila því þar hafi farið fram skuldabréfaútboð þar sem bankanum hafi verið aflað lánsfjár.

Gert er ráð fyrir því að vitnisburðurinn hjá hverjum og einum geti tekið tvo daga. Jón Ásgeir er boðaður til að gefa vitnisburð mánudaginn 23. ágúst næstkomandi og svo mæta koll af kolli hvern virkan dag þar á eftir, Þorsteinn Jónsson, Jón Sigurðsson, Lárus Welding, Pálmi Haraldsson, Hannes Smárason og Ingibjörg Pálmadóttir, allt til 31. ágúst. Vitnaleiðslurnar fara fram á lagaskrifstofum Steptoe & Johnson í New York og hefjast allar klukkan tíu árdegis.

Framlagning gagna og mótgagna vegna frávísunarkröfu sakborninganna og annarra krafna í málinu stendur fram í október næstkomandi, en 12. þess mánaðar verður frávísunarkrafan sjálf tekin fyrir. Í skjölum sem birt hafa verið á vef dómsins kemur fram að skilanefndin krefur sjömenningana um ítarleg gögn. Má þar nefna gögn varðandi ferðir þeirra, búsetu, eignir, viðskipti, eignarhald fyrirtækja og umfang fyrirtækjareksturs í Bandaríkjunum.

Þannig er krafa um gögn frá Jóni Ásgeiri í 72 liðum. Í þeim fyrsta er krafist gagna sem staðfesti hvern dag sem hann hefur dvalið í New York, í öðrum hvern dag sem hann hefur dvalið í Bandaríkjunum, og þeim þriðja gögn sem staðfesti hvern dag sem hann hefur dvalið á Íslandi frá byrjun þessa árs.

Steinunn Guðbjartsdóttir, formaður slitastjórnar Glitnis, hafði ekki kynnt sér af hverju sóst væri eftir þessum gögnum í gær. Hún á von á því að niðursaða fáist í málið öðru hvoru megin við næstu áramót.

olikr@frettabladid.is