Ísjaki sem er tuttugu sinnum Heimaey brotnaði frá Grænlandi

Gríðarlega stór ísjaki hefur brotnað frá Grænlandsjökli. Samkvæmt frétt BBC um málið er jakinn 260 ferkílómetrar að stærð, eða tæplega tuttugu sinnum Heimaey.

Þetta er stærsti borgarísjaki sem sést hefur síðan árið 1962 en jakinn brotnaði á fimmtudaginn frá jökli sem kallaður er Petermann-jökull á norðvesturströnd Grænlands. Hann er um þúsund kílómetra sunnan við Norður-Pólinn, í Naressundi sem er á milli Grænlands og Kanada.

Jökullinn sést vel frá gervihnattamyndum og þar sést einnig að Petermann-jökullinn hefur minnkað um fjórðung eftir að ísjakinn brotnaði frá jöklinum. Talið er að ef jakinn færist enn sunnar geti hann truflað skip sem sigla um svæðið, er haft eftir Andreas Muenchow prófessor í Delaware háskólanum.

Vatnið sem er frosið í ísjakanum gæti nægt sem drykkjarvatn fyrir alla íbúa Bandaríkjanna í 120 daga, segir Muenchow prófessor. Ekki liggur ljóst fyrir hvort að ísjakinn hafi brotnað frá jöklinum vegna hlýnunnar jarðar.