Gerði sjampóauglýsingu á Spáni

„Þetta er bara eitt af þessum verkefnum sem detta inn á borð hjá manni,“ segir leikstjórinn Reynir Lyngdal. Ólíkt flestum Íslendingum eyddi Reynir ekki páskunum í súkkulaðieggjaát heldur tók upp sjampóauglýsingu í höfuðborg Spánar, Madríd, sem sýna á í flestum Mið-Austurlöndum. Aðalleikararnir í auglýsingunni voru Ahmed Hassan, fyrirliði egypska landsliðsins og einn leikjahæsti landsliðsmaður heims, og Antar Yahia, aðalstjarna alsírska landsliðsins. Til gamans má geta að Alsír og Eygptaland áttu í harðri baráttu um sæti á heimsmeistaramótið í Suður-Afríku þar sem hálfgert frost ríkti í samskiptum ríkjanna meðan á þeirri rimmu stóð. Alsíringar höfðu sigur í spennuþrungnum leik og skildu Egypta eftir með sárt ennið.

Reynir segist ekki hafa hugmynd um hvernig þetta verkefni rataði í hendurnar á honum, hann hafi þó gert fótboltaauglýsingar fyrir Landsbankann og leikstjórinn býst fastlega við því að önnur hver auglýsing á næstunni eigi eftir að hafa knattspyrnukeim, svo ekki sé meira sagt.

Reynir brá sér jafnframt á völlinn í Madríd og sá litla liðið Atletico Madrid etja kappi við Baskana frá Bilbao. „Þetta var ótrúleg upplifun. Maður hefur aldrei skilið þetta æði í kringum knattspyrnu en þarna fattaði maður þetta. Og orðbragðið sem menn nota er rosalegt.“ - fgg