Segir Arion hafa rekið svínabú af vanþekkingu

Arion banki hefur selt Stjörnugrís rekstur gjaldþrota svínabúanna Brautarholts á Kjalarnesi og Hýrumels í Borgarfirði. Bankinn tók svínabúin yfir fyrr á árinu vegna skuldavandræða. Búin voru boðin út en ekkert tilboð barst nema frá Stjörnugrís.

Fram kom í fréttum Ríkisútvarpsins í gær að á meðan bankinn hafi rekið búin hafi hann þurft að greiða á annað hundrað krónur með hverju kílói sem framleitt var á búunum.

Geir Gunnar Geirsson, framkvæmdastjóri Stjörnugríss, segir svínabúin hafa verið rekin af vanþekkingu af Arion banka og það skýri tapið. „Þetta var mjög illa rekið á öllum sviðum enda er kannski ekki eðlilegt að banki starfræki svínabú frekar en önnur fyrirtæki,“ segir hann. Slíkur rekstur krefjist mikillar sérþekkingar og bankann hafi skort hana.

„Þetta er okkar fag og þess vegna sjáum við tækifæri í hluta af þessu þótt þeir hafi tapað gríðarlega.“ Fyrir hafi stór hluti af viðskiptum búanna verið við Stjörnugrís.

Geir Gunnar segir að mikil offramleiðsla hafi verið á svínakjöti hérlendis að undanförnu og fyrirséð sé að minnka þurfi búin.

Hann segir aðspurður að búin hafi ekki fengist á gjafverði. „Nei, langt því frá. Þetta var keypt á mjög sanngjörnu verði.“ - sh