Breiðavíkurnefnd: Kannað hvort rannsaka þurfi fleiri heimili

Fjöldi ungs fólks, sem segir að brotið hafi verið á sér á opinberum meðferðar- og vistheimilum, hefur leitað til Breiðavíkurnefndarinnar. Formaður hennar segir nefndina ekki rannsaka heimili sem starfrækt voru eftir árið 1992. Kannað verði hvort tilefni sé til að rannsaka nýrri heimili í ljósi þessara frásagna.

Nefndin sem í fyrstu rannsakaði starfsemi Breiðavíkur hefur einnig kannað svipaðar stofnanir annars staðar á landinu svo sem Heyrnleysingjaskólann, Kumbaravog og skólaheimilið Bjarg. Nú rannsakar nefndin uppeldisheimilið Silungapoll, Jaðar og Reykjahlíð og hefur verið auglýst í blöðum eftir því að fyrrverandi vistmenn gefi sig fram til viðtals.

Róbert Spanó, formaður nefndarinnar sem rannsakar starfsemi vistheimilanna, segir að frá því í september 2008 hafi nefndin tekið nær 300 viðtöl. „Í þeim viðtölum þá hafa einnig komið fram hjá sumum frásagnir sem þessir aðilar telja vera illa meðferð og ofbeldi á öðrum heimilum en þeim sem við erum að kanna þessa stundina. Eitt af því sem verður verkefni nefndarinnar þegar hún lýkur við störf sín í apríl 2011 er að taka afstöðu til þess hvaða tillögur á hugsanlega að gera um framhald könnunar af þessu tagi, þá geta upplýsingar sem við erum að fá í gegnum þessi viðtöl varpað ljósi á og kannski grundvöll fyrir slíkri könnun," segir Róbert.

Hann segir engu fólki vísað frá þótt það komi frá heimilum sem eru utan þess sem nefndin á að kanna með lögum.

Róbert segir að nú miði rannsóknin að heimilum sem starfrækt voru árið 1947 til 1992, eins og lögin séu þá geti þeir ekki fjallað um önnur vistheimili en þau sem ekki séu starfandi og því sé tímabilið eftir 1992 ekki á starfsviði nefndarinnar eins og er. „Öll viðtöl sem að við tökum og allar upplýsingar sem við fáum, við fáum líka upplýsingar í gegnum tölvupóst og síma, reynum við að skrá niður. Þannig að þessar upplýsingar liggi fyrir til að mat okkar sé sem áræðanlegast þegar þar að kemur."