Vill að ráðherra íhlutist um að HM verði í opinni dagskrá

Páll Magnússon útvarpsstjóri beinir því til Katrínar Jakobsdóttur menntamálaráðherra að hún íhlutist um að leiki íslenska handboltalandsliðsins á komandi heimsmeistaramóti verði að sýna í ólæstri dagskrá. Í dag var tilkynnt um að mótið verði sýnt á Stöð 2 Sport en ekki í Ríkissjónvarpinu eins og venjan hefur verið.

Páll var í viðtali í síðdegisútvarpi Rásar 2 í dag og þar sagði hann það á færi menntamálaráðherra að fara fram á að íþróttaviðburðir á borð við þennan verði að vera sýndir í opinni dagskrá. „Í evróputilskipun um sjónvarp, sem Ísland er aðili að, er gert ráð fyrir því að einstök lönd geti sett á lista íþróttaviðburði sem ekki má læsa í áskriftarsjónvarpi," sagði Páll.

„Ef það er eitthvað í íslensku íþróttalífi sem ætti heima á þessum lista er það væntanlega íslenska handboltalandsliðið í úrslitakeppni á heimsmeistaramóti," bætti útvarpsstjóri við og sagði það á færi menntamálayfirvalda að setja saman lista af þessu tagi. „Og ef það er einhverntíma tilefni til að setja svona lista saman á Íslandi hlýtur það að vera núna."

Pálmi Guðmundsson framkvæmdastjóri dagskrársviðs 365 segir að þar sem blekið sé nýþornað á samningnum þurfi menn nokkra daga til þess að skipuleggja mótið og fyrirkomulag útsendinga. „Það liggur því ekkert fyrir nákvæmlega með hvaða hætti við munum halda á spilunum. Rétthafi mótsins hefur verið að selja þessa keppni bæði í opna og læsta dagskrá, til dæmis á Norðurlöndunum," segir Pálmi og bendir á að í Svíþjóð og víðar hafi keppnin verið sýnd í læstri dagskrá án íhlutunar þarlendra menntamálaráðherra.