Kjötfarsverð stöðugast af unnu kjöti

Miklar verðsveiflur hafa verið á unnum kjötvörum á síðustu árum. Verðbreytingar hafa þó verið misjafnar eftir vöruflokkum, eins og sjá má á meðfylgjandi töflu frá Hagstofunni og DataMarket.

Kjötfars hefur haldist hvað stöðugast af vöruflokkunum, en lifrakæfan hefur hækkað mest og rúmlega tvöfaldast í verði, eða úr 623 í maí 1997 upp í 1.350 krónur í maí 2010. Miklar sveiflur hafa verið í verði á nautahakki, en það hækkaði mest upp í 1.270 krónur á kílóið í maí 2006 en féll svo aftur niður í rúmar 1.100 krónur á kílóið í febrúar árið eftir.

Kjötfars hefur hækkað minnst, en kílóverðið var 383 krónur í maí 1997 og í maí 2010 var það 520. Það hefur þá hækkað um 35 prósent. „Kjötfars getur verið mjög misjafnt eftir því hvernig það er framleitt,“ segir Steinþór Skúlason, forstjóri Sláturfélags Suðurlands. „Kostnaður getur auðveldlega verið lækkaður með því að nota ódýrara hráefni saman við það.“

Steinþór segir framboð á ódýrara kjötfarsi vera að aukast sökum ódýrari íblöndunarefna. Aftur á móti sé nautahakk hrein kjötvara án auka hráefna og fylgir því eðlilegum verðsveiflum markaðarins. - sv