Hafnarstjóri í Landeyjahöfn: „Margir bílar eru stórskemmdir“

Ökumaður, sem er grunaður um ölvunar- og fíkniefnaakstur, ók á átta kyrrstæða bíla við Landeyjahöfn um eitt leytið í nótt. Fjórir bílar, auk bílsins sem maðurinn ók, eru óökufærir, samkvæmt upplýsingum frá Lögreglunni á Hvolsvelli.

Svo virðist sem hann hafi straujað eina röðina á bílastæðinu við Landeyjahöfn. Tvö voru í bílnum og var ökumaðurinn handtekinn á staðnum í nótt, og reyndist hann, auk þess að vera undir áhrifum fíkniefna og áfengis, ökuréttindalaus.

Lögreglan hefur reynt að ná sambandi við eigendur bílanna en þeir eru allir á Þjóðhátíð í Vestmannaeyjum.

Sigmar Jónsson, hafnarstjóri í Landeyjahöfn, segist hafa séð ummerkin í morgun. „Ég sá ummerkin eftir hann þegar ég keyrði þarna fram hjá í morgun. Margir bílar eru stórskemmdir," segir hann. Ekki er vitað hvað maðurinn var að þvælast á svæðinu, en síðasta ferð með Herjólfi fór klukkan níu í gærkvöldi og sú fyrsta í dag fór klukkan tólf. „Herjólfur var ekkert á ferðinni svo ég veit ekki hvað hann ætlaði sér."

Herjólfur fór, sem fyrr segir, í sína fyrstu ferð í dag klukkan 12. Sigmar segir að nánast hafi verið fullt í þá ferð. Þá er næsta ferð klukkan þrjú, og svo sex og níu. Búist er við því að um þúsund manns fari með Herjólfi í dag. Hann byrjar svo að sigla klukkan hálf átta í fyrramálið, til að ferja þjóðhátíðargesti í land, og mun sigla nánast stanslaust fram á fimmtudag, segir Sigmar.