Sjóðurinn þolir myntkörfuskellinn

Fjárhagslegri endurskipulagningu Sparisjóðs Norðfjarðar er lokið. Seðlabankinn leggur honum til 150 milljóna króna stofnfé og Byggðastofnun 240 milljóna króna víkjandi lán í skiptum fyrir 49 prósenta eignarhlut. Við það verður stofnfé sparisjóðsins rúmar 620 milljónir króna og verður eiginfjárhlutfall hans 22 prósent.

Stofnfjárhlutir ríkisins hafa verið framseldir til Bankasýslu ríkisins sem fær tvö stjórnarsæti í sparisjóðnum að loknum aðalfundi í enda mánaðar. Bankasýslan auglýsti eftir tilnefningum í stjórnir þeirra sparisjóða sem fyrirséð er að komi í eigu hennar á næstunni.

Vilhjálmur G. Pálsson sparisjóðsstjóri segir sparisjóðinn hafa orðið fyrir miklu tjóni í bankahruninu haustið 2008 og stjórn hans óskað eftir eiginfjárframlagi frá ríkinu í janúar í fyrra. Um svipað leyti hafi einstaklingar og fyrirtæki í Fjarðabyggð lagt honum til nýtt stofnfé upp á 253 milljónir króna.

Vilhjálmur segir stöðu sparisjóðsins, sem er með útibú í Neskaupstað og Reyðarfirði, sterka eftir niðurstöðuna. „Við eigum að þola verstu hugsanlegu niðurstöðu er varða uppgjör á lánasamningum í erlendri mynt og vel það,“ segir hann. - jab