Fíflar og lauf í SÍM

Sigríður Rut Hreinsdóttir er SÍM-ari febrúarmánaðar og sýnir olíumálverk sem unnin eru á árunum 2001-2008 í sal SÍM í Hafnarstræti. Myndefnið sem hefur verið henni hugleikið um tíma er fíflar og lauf.

„Lauf, sem í fljótu bragði virtust aðeins ófögur lauf, urðu við nánari athugun gjafir að ótal hugmyndum í sínum óendanlega fjölbreytileika og fegurð,“ segir Sigríður. „Myndirnar eru leikur að línum á myndfleti í samspili lita og ljóss, eins og tónar í músík. Óður til náttúrunnar og landsins.“

Afgreiðslutími er á virkum dögum á milli kl. 10 og 16. Á Safnanótt á föstudaginn verður Sigríður til viðtals um verk sín á milli kl. 19 og 23. Sýningin stendur yfir til 26. febrúar.