Best að ljúka Icesave málinu við samningaborðið

Fjármálaráðherra segir að stjórnvöld muni taka til varna vegna áminningar ESA. Vænlegast sé þó að ljúka Icesave málinu við samningaborðið, ef ásættanleg niðurstaða fáist. Ákveðin áhætta felist í því ef málið fer fyrir EFTA dómstólinn.

ESA, eftirlitsstofnun EFTA, telur að Ísland hafi brotið gegn tilskipun um innistæðutryggingar með því að tryggja ekki greiðslu lágmarkstryggingar á Icesave reikningunum. ESA sendi áminningarbréf þess efnis í gær og hafa stjórnvöld 2 mánuði til að svara því.

Steingrímur J. Sigfússon, fjármálaráðherra, segir að byggja verði vandlega upp málsvörn Íslands.

„Við munum að sjálfsögðu taka til þeirra varna sem við getum, þó að þetta álit ESA sé í sjálfu sér mjög skýrt og þeir hafni þeim sjónarmiðum sem íslensk stjórnvöld hafi reynt að halda í en það viðhorf þeirra eða sú afstaða kemur nú ekki á óvart. Veruleikinn er sá að við höfum staðið afar einangruð með þau sjónarmið okkar að okkur bæri ekki ótvíræð skylda í þessum efnum og það væri lagaóvissa til staðar. Nú er þetta ekki dómur heldur álit en það gengur gegn okkar sjónarmiðum eða fellur okkur í óhag," segir Steingrímur.

Mikilvægt sé að bregðast yfirvegað við, þar sem um er að ræða afdrifaríkt mál fyrir þjóðarbúið. Alltaf hafi verið ljóst fyrir að það skipti miklu máli fyrir Ísland upp á framhaldið að ljúka ágreiningnum með samningum.

„Mín afstaða er auðvitað sú að það sé vænlegasti kosturinn að ljúka þessu við samningaborðið ef ásættanleg niðurstaða fæst þar," segir Steingrímur.

Ef samningar náist við Breta og Hollendinga um greiðslu á lágmarkstryggingunni kunni ESA að láta málið niður falla. En hvað ef málið fer fyrir EFTA dómstólinn?

„Það er í öllu falli ljóst að það er heilmikið áhætta í málinu, litlar líkur á að það færi betur en svo að við værum talin ábyrg fyrir lágmarksfjárhæðinni en áhætta ákveðin í hina áttina," segir Steingrímur.