Samningar í höfn hjá Norðuráli á Grundartanga

Kjarasamningar tókust milli Norðuráls Grundartanga ehf. annars vegar og FIT, VLFA, Stéttarfélags Vesturlands, VR og RSÍ hins vegar, kl. 01.30 aðfararnótt 20. apríl. Fundur hafði þá staðið í rúma 16 klukkutíma. Samningurinn gildir til 31. desember 2014. Þetta kemur fram á vefsíðu Ríkissáttasemjara.

Á vefsíðu Verkalýðsfélags Akranes segir að meginkröfur stéttarfélaganna náðust fram í þessari mjög erfiðu kjaradeilu. Samningurinn mun gefa starfsmönnum á 1. ári 11,2% launahækkun, en inni í þeirri tölu er eingreiðsla upp á kr. 150.000 sem verður til greiðslu í maí 2010.

Heildarlaun vaktavinnumanna á 5 ára taxta í dag með öllu eru kr. 406.418. Þau munu hækka í kr. 439.418 eða sem nemur kr. 33.000 á mánuði. Laun eru að hækka um kr. 30.000 og upp í tæpar 34.000 kr. á mánuði. Samningurinn mun gilda frá 1. janúar 2010 til 31. desember 2014. Hafa ber það í huga að launaliðurinn verður laus um næstu áramót og verður þá samið um hvernig þróun launaliða skuli háttað á samningstímanum.

Eitt gríðarlega mikilvægt atriði náðist fram í þessum kjarasamningum, en það var að nú munu starfsmenn Norðuráls eiga verkfallsrétt eins og flestir aðrir launþegar þessa lands. En eins og flestir vita þá var gengið frá því í kjarasamningum 1998 að starfsmenn Norðuráls höfðu ekki slíkan rétt. Nú er, eins og áður sagði, búið að ná þessum rétti aftur inn og var það ekki átakalaust.

Á heildina litið er formaður Verkalýðsfélags Akraness mjög sáttur með þennan samning, enda náðust fram allflestar meginkröfur okkar eins og áður hefur komið fram. Þessi barátta hefur staðið yfir frá 30. október 2009 eða í tæpt hálft ár og er ein sú alerfiðasta kjaradeila sem formaður hefur tekið þátt í að leysa frá því hann tók við formennsku í Verkalýðsfélagi Akraness, að því er segir á vefsíðunni.