Kvíðir fyrir kynlífssenum

Robert Pattinson, aðalleikarinn í Twilight-myndunum, kvíðir fyrir því að leika í kynlífssenum á mótu Umu Thurman í næstu mynd sinni, Bel Ami.

Í Bel Ami, sem verður frumsýnd á næsta ári, leikur Pattinson blaðamanninn Georges Duroy sem fikrar sig upp í hæstu hæðir samfélagsins með því að sofa hjá háttsettum konum. Í myndinni mun Pattinson fækka fötum fyrir framan Christinu Ricci, Kristin Scott-Thomas og Umu Thurman. Kvíðir Pattinson mest fyrir því að leika á móti Thurman. „Kynlífssenurnar með Umu trufla mig dálítið. Persóna hennar notar kynlíf sem nokkurs konar vopn og mín persóna hugsar eins og dýr. Það er dálítið mikið af kynlífssenum í þessari mynd, þannig að ég ætlast til mikils af sjálfum mér og það með mismunandi konum," sagði Pattinson.

Auk þess að hafa áhyggjur af frammistöðu sinni í Bel Ami hefur Pattinson lýst yfir áhyggjum af gangi mála varðandi fjórðu og síðustu Twilight-myndina, Breaking Dawn. Hann vill að framleiðendur hennar ákveði tökudag sem allra fyrst til að hann geti skipulagt næstu verkefni sín í kringum myndina. Tökum á þriðju myndinni, Eclipse, er þegar lokið og kemur hún á hvíta tjaldið í júlí næstkomandi. „Það væri gott ef maður vissi hvað er að fara að gerast. Það er dálítil byrði að vita ekki hvenær Breaking Dawn fer í tökur. Það er slæmt að eitthvað sé fram undan sem maður veit ekki hvenær verður. Það er erfitt að skipuleggja líf sitt í kringum eitthvað sem maður veit ekkert um," sagði hann.

Síðustu tvær Twilight-myndir hafa notið gríðarlegra vinsælda að undanförnu en þær eru byggðar á samnefndum bókum Stephanie Meyer.